1 Timothy 2
Vote'i sou Lalotu
1La sou eni alingaine pekia'u tei aloxo 'o. Nini nakilakasi'a ta mitema ukalusi. Lexe nini nakilakasi'a, la nalinga ulai noxou Lataua no anu mii ma'ia ane ane'i mimasaxau mo nakilakasi'a sou Lataua usu'uline'i mo navikala laixe ulai noxou Lataua no anu mii ma'ia ane anu mu'oxonu mulai noxi'a ta mitema. 2Mo nakilakasi'a ta tatananu tuatuala ilo'a ta tatila sou tuatuala kalumo. Mo sou nenge oponenge uai se'isisi la taxolu laixe. Taxolu la tamulinu 'ili'ilixo ane Lataua mumasaxau mo tatoxone'i ta mitema kalumo. 3'Ilixo sou lakilaka ane loxo ne, anu laixe misevile no iou Lataua, Anu itema sou pamauli. 4Anu umasaxai'a ta mitema tavu'alo ukalusi sou lexe imauli mo ilavu laixe no anu vaikala manina. 5Xo nenge telavu lexe Lataua anu vilesisi, mo aili'i vilesisi a muxolu sou upitane'i ta mitema ilo'a Lataua vilesisi, aili'i ane ne, Anu ane Kalisito Iesu. 6 aAnu mu'italo maulixu sou ulosi'a ta mitema latala. Mii ane ne, muxali no voxo ane Lataua musosovosou. 7 bTava'u aloxo ne, la sou anu Lataua musosovosilo sou aa'aloxu Iesu mo exali amitema sou xaixai noxou Iesu Kalisito mo itema sou alosieixu ta asila sou imuxaxu tane'i mo ilavusou vaikala manina. Eni akalavoi uasi. Eni evikala maninasi.8Eni emasaxa lexe nini nalosie'ixa'a ta mulu no tuatuala ukalusi sou lexe ane'i itolosou avo'a ulai teitexi sou ilinga. Lexe ane'i ilinga, la la'iaxa'ai'a ta mitema mo opone'i tamei uasi.
9 cMo eni emasaxa lexe nini nalosie'i ta sema no anu vote'isou tokolomoi'a. Itokolomo, la ixavutala laixe, ka sou itokolomo laixe no ie'i ta mitema. Ia itokolomo no anu tokolomo ane sou u'oxonu ta mulu xavutalai'a masua uasi. Ixiunu laxusi'a uxali iouiou uasi mo i'ai xapo iouiou uasi mo itokolomoxu mimii ane lamolisou toxotoxoxa'a uasi. 10 dIa ane'i ivikala lexe itoxonu Lataua, la anu laixe lexe i'oxonu xaixai laixe. Ane'i i'oxonu aloxo ne, la anu tokolomoxa'a maninasou ane.
11Eni emasaxa lexe ane'i ta sema ne ilavu aloxo 'o. Ane'i ixolu se'isisi mo ilomuxu vaikala noxi'a ta mulu. 12 eAnu aloxo 'o Lataua mukoinu Adamu tei xe ili'i, la sou mukoine Iva. Mo Adamu ulomuxu vaikala noxou Satani uasi, ia semasi ane milomuxu vaikala noxou Satani mo ane mi'oxonu 'ilixo masua. La sou eni emasaxa lexe ta sema ilosieixa'a ta mulu mo ixolu tila noxi'a ta mulu sou isaxila'a uasi. Ane'i ixolu se'isisisi. 15Lexe imuxamuxaxu tane'i noxou Lataua xe imasaxai'a ta mitema mo itetelisou 'ilixo laixe noxou Lataua no anu xavutalai'a laixe, la sou no voxo ane sou ane'i ivo'one'i ta 'ili'a, la anu Lataua usu'ulene'i.
Copyright information for
ATA